|
黎到呢度 见到有D XDJM写咗自己响外地嘅见闻之后
突然间想写返06年底系北京嘅两个月经历..
以下所遇到嘅都系北京人,
北京有80服务行业都系只招本地人黎嘅
的士,公交车,地铁,戏院,客服,,M记K记XXX记大部分都系
首先,北京人系吾讲普通话嘅,系讲北京话,
冇错,佢哋用北京话当普通话黎讲,
所以有好多北方土语将会大派用场~
吾理你明吾明,你吾识听啊?
"你丫怎么连北京话都听不懂"~
(老大~我不是北京人怎么会听得懂呢)
令外地人根本吾可以好快适应到,
我哋都吾会用广州话同外地人讲嘢卦?
就算D阿公阿婆吾识普通话都会好努力咁用自己果套走调版嘅普通话同外地人讲嘢啦!!绝对吾会咁样
好,入乡随俗啦,条痢卷到咩咁都要卷上去讲啦~
顶硬上呀~鬼叫你穷~
系海淀南路租咗间屋啦,2600压一付三,好好噶喇,中关村附近
冇电信(北京系网通天下,同广州恰好相反),
打去申请网通呢,
佢话"本地身份证可以申请1M,外地身份证只可以申请512K"
我问点解,佢话无解,
1M已经好吾掂下噶啦,仲要咁,开头谂住稳个BJ人帮手嘅,
顶佢个肺,越谂越谷气,申请长宽7!
咁果间屋住11楼,开头都知道12点就收lift噶啦,
经常过咗12点返就惟有爬楼梯当keep fit啦,
零下九度爬11楼吾知你会咩感觉呢
呢D都算啦
果栋楼都好耐下了,可以用残夹旧黎形容,
果个lift每日都有D阿婶轮班嘅,早上六点到晚上十二点
仲有升降机驾驶员守则啊,一额汗~~~一日就坐系lift里面咯
佢去洗手间仲要等佢去完先可以呢~~
实在太"先进"啦!!!
里面居然有个北京大婶,年过半百噶啦,
讲野大大声咁,成日摞住个电梯phone系度同人讲野
个姿势同态度拍得住一个党委书记,
我初黎报道,梗系要比人好印象噶啦,话晒都朝见口晚见面
我第一次行入去个lift度,佢用眼尾望咗我一眼继续睇佢报纸,
跟住我企好,
讲"11楼,谢谢"跟住用只右手不太耐烦地咁click咗11楼
到咗11楼出去,我行出去果阵回头就话"谢谢"
跟住非常记得佢又用尾眼哨咗我一眼
然后拉长讲咗一声"嗯~~~~~~"
冇晒意见..
北京好多七仔系冇烟卖嘅,原因听讲系政府吾畀人摞烟牌,
但系我又见到有D七仔有卖烟,怪,
但系酒牌就真系冇,所以北京七仔冇酒卖
一直提倡微笑服务宗旨嘅服务行业
到咗北京,
去咗戏院:系睇黄金甲嘅,果阵岩岩首映,买完飞我问,"请问洗手间在哪呢?"个售票员望都无望我,讲"那边",我话"那边就是哪边呢?"
跟住好吾情愿咁递起只右手"那边",我话"然后呢?",跟住继续dup低头继续吾望我讲"到了就看到了"
权金城(北京十大连锁餐厅之一,食韩国烧烤嘅,门口仲要着住韩服)
我哋食完嘢埋完单,通常都会找钱跟住讲"谢谢光临"噶啦
今次系经理行过黎添,佢都未企好,个头都吾系望我哋呢边嘅,
好似好赶咁令咩面讲"谢谢光临",真系听都未听清,都吾知系米同我哋讲噶,大佬,你经理黎噶喔
公车(有人售票既,仲有双截棍嘅车,即系两截车厢嘅公交车,依然发展到有空调噶,升级咗)
个北京女人售票员,我企系度,佢好大声咁叫个后生仔起身
"让座呀让座呀~~你丫~快起来给老婆婆让座",吾听嘅话就加大分贝,叫咗你让为止
地铁:
全部人工售票,一二号线人工撕票再上车,要行出站过马路行好大一段路先换乘到十三号线,第一次搭嘅话你真系要好好思考点搭北京地铁先得,北京地铁系1970建好嘅,吾可以同广州一号线比较,但系
点解同样1979年开通嘅香港地铁到依家都吾会有呢个感觉呢?
BJ地铁脏乱差,设备已经非常残旧,地铁班车一停站就5分钟先关得门,等D人上晒先肯关,点解吾好似我哋咁开密D车准时到达呢?
人哋香港都系迟你九年姐,都系70年代,点解到依家比我感觉都系新嘅一样呢?鬼咩,三十年都又吾换车吾update,人工售票撕票三十年不变,点玩啊
呢D系我两个月系北京小小嘅见闻,
或者我要求高可能有DD偏激啦
但内容绝对真实,吾知去咗北京嘅人有冇同感呢? ------
|
