[游记]西贡湾仔治疗私日记

果d好想好想今次可以實行喇!!

今次可以去睇星星喇...今個星期六、日同朋友仔去咗西貢灣仔wild camp,睇天文台話有雲,星期日又轉冷,其實都唔expect有得睇星。星期六放咗工就搭車會合下午班,買完嘢就坐巴士入黃石碼頭再轉船,入到去上午班朋友仔已set好營仲要瞓完個午睡(真係令人妒忌),佢地仲好叻咁霸到個亭...之後放好行李,成班人吹咗一陣水,之後就去咗準備晚飯,朋友仔真係好pro,成set架撐乜都齊,成班人係個亭煮臘腸飯+2餸1湯,仲好好味添,真係勁!佢地煮飯果時我就去咗睇星星,估唔到個天好清(天文台真係流流地),好多星星,比上次去睇星更多,但我今次就無瞓草地,因為無著GORE-TEX,朋友仔仲帶埋望遠鏡,我用嚟睇月亮,真係好清,好靚。食完飯洗完碗,成班人就轉移地方出去空地起camp fire吹水...佢地真係好攪笑...之後仲煲咗個腐竹蛋糖水,好味...食完糖水朋友仔們就再移好d營瞓覺,因為個天開始返風,要用d釘釘好d營,之後就去瞓,(其實入到營當然無咁早瞓喇),之不過係瞓係度吹下水,營入面有營入面傾,外面又有外面傾,到3點先真正各自瞓覺。但返風真係好大風,個營成晚都聽到"飈飈"聲,瞓到咁上下我都忍唔住要著返件長袖衫,到天光仲要冚埋件fleece,之後無咗fleece做枕頭加上好急,8點就起身去廁所,去完都唔想瞓,就係營地到處行下。返到去朋友仔已經起咗身收拾個天幕,又吹水...之後越嚟越多人起身,又開始煮早餐,有鹹牛肉炒蛋加法飽,yummy。之後同朋友仔去咗附近行咗一圈,果度都唔係好大,40分鐘就行完,返到去朋友仔已經開始收營,最攪笑係佢地成日將個營"粒"落d人度,真係勁攪笑,玩咗一大陣就煮午餐,食完收拾好所有嘢就行返出海下再搭車返西貢完成2日1夜之旅。

雖然我唔係好多嘢講,但係佢地真係好好玩一d都唔悶,而且佢地真係好pro,個camp簡直係食得招積住得舒適,下次唔知幾時又有得再去玩呢?