[游记]清远

时间：2006年7月22日

天气：大晴天，万里无云

地点：清远黄腾峡

活动：漂流（猛士漂）、游小北江、循例生态讲座

费用：130龟/人

平时嘅我，边度都唔去，周末日早上基本上都未见过太阳喺点嘅，就算一至五都喺翻工放工，加多少夜生活咁，无乜特别嘅遭遇。而今日嘅旅程就好多事发生~~`

7:15

仲未酒醒兼未瞓醒嘅我…俾悦耳嘅手机铃声嘈醒咗~~`

“喂無忌(我化名)你仲未嚟啊？唔好话俾我听你仲未起身啊”

“呀~~`嗯…………………………！喔 ！！！！喺喔！~~~PuJie啦，瞓过笼添！！”

“快D啦我同导游讲话你去咗爆石~~`快D过嚟！！”

十分钟后，我执好晒所有要带去嘅野后出门，飞的过去~~`中途仲唔少得寻晚去蒲完翻嚟买定嘅康师苦~~`一路去一路食……赶到我呢……~~`

8:00

人齐开车

可能因为上车前太赶急，令原本处于宿醉状态嘅我变得好精神，希望今日有个愉快嘅旅程。

具体行咗几耐车我唔太记得，响车上我同个已婚女人（就喺求先打嚟嘈醒我果个）一齐坐，同佢讲下D电影之类嘅话题（我嘅电影版闷咗好耐-_-!!），咁坐响架车度，我就好自然咁啉起“大逃杀”，一班学生的毕业旅行变左死亡之旅~~听到佢起晒鸡皮……于是我当然趁胜追击，就话：“嗱，你睇我地今日呢位导游同司机，表情喺咪好唔妥呢~~`阵间去到一个类似山腰咁嘅地方，佢地突然中毒死咗！我地所有人都被困响呢度，落车仲喺四野无人，手机无信号，车上嘅油啱好用晒……”我未讲完，姖就将车上对住嘅佢空调关咗，缩埋一二角度震~~`^_^~~``

讲翻翻嚟，介绍下今次旅程嘅导游同司机；女全陪导游，一睇就知喺新手，讲野口疾疾~~后来得知佢只喺parttime，50龟/日，咁就算啦；司机，一汽嘅，长期荡失路，揸又揸得慢…；

女地接，清远本地人，讲咗句好搞野“嗱我地阵间就先去’瓢’，’瓢’完再去食饭……”（大家知道我地广东白话读“漂”，姖读成“瓢”~~瓢妓嗰瓢~~意思即我地话先去滚咁解~~`咁早就有得去瓢~~~`全车大笑~~^o^）

到达目的地，我地第一站就喺先去漂流……我地虽然跟团，但相识结伴就啱好十人，五只艇~~`我同另一个壮男partner（我都好想同MM咖，但无奈体重唔够T_T!!）落艇前我地都一人揸一个兜~~~喺用嚟泼人水嘅~`~~点知我落艇之后，挂住稳扶手而唔记得咗个兜~~`只艇未俾人推出一米就俾水冲咗我手上个兜啦~~`天啊，无兜我咪泄晒章，求先坐车上山果阵见D人打水战好撚凶狠喔！~~`high晒啦，好！我仲有头盔~~`哈哈~~`其实头盔比兜更加好用，但我就搞到好狼狈~~`一路泼水一路顾住就冲落去要带翻头盔~~`@_@~~`

虽然好多人一齐漂过，但有D位置都咪话唔刺激~~``开始冲嘅第一下未习惯，几乎饮水……

漂到果个写住“下面12米高”嘅地方（三层楼啊），我同partner都停低抖抖，整理一下艇上嘅积水。做好晒心理准备同身体准备之后，咬实牙冲落去！！~~``落到去之后发觉，果个位应该唔喺最激嘅，但肯定喺最危险嘅！我地落去无耐，有只艇喺两个女仔坐，可能重量唔够，一个女仔反咗出去……好在姖仲有一只手捉住只艇跟住落嚟，如果唔係就留响上面俾下只艇撞飞落12米~~`后来我仲听讲过若干事故，都喺来自12米深处，更加有人撞到损手烂脚……我自己都好惊啊，因为体重唔够，所以只艇装住一定份量嘅水加重，但冲落去果阵，有一秒钟我係只有两只手係捉住只艇~~~而成个身係离开咗只艇嘅~~``@_@!!!!~~``

所以话呢个猛士漂……好玩真喺几好玩，够刺激，但真喺好危险，唔够手腕力同体重嘅去玩就要小心注意！！！飞出嚟嘅女仔相信都喺惊得济先捉唔实…~~~所以死人霖楼都要捉实啊~~~``

漂完之后就去游小北江上船食饭……中途行错两次路，只船又玩delay，最后两点几先有得食……我地报嘅团应该喺有河鲜嘅，但食晒之后都无食到一只河鲜……郁闷（呢个时间已经引起大部分团友不满）好在食完饭趁有多少时间未上岸~~`我三个人玩咗若干盘21点以及牛牛，独赢20龟~~`俾翻少少安慰~~`：P

上岸后就去果D咁嘅循例生态讲座，去固定嘅景点听当地嘅人讲呢样讲果样，最后sell野俾我地咁……由于当日好热，而旅团嘅安排又唔喺太好，导致已经有一部份团友嚟到呢part就开始鼓噪~~`到最后一part嘅讲座仲要等上一批团走先可以入去听~~`继而出现咗骂战：

废话之人：“你地有边D人喺唔想听落去咖？”

后生团友：“最后生果几个唔想听落去啊！”

……详细激起果句骂战嘅说话我后面唔太记得啦，反正最后一女子团友以对方全家人为根据狂出粗鲁嘅动词~~`跟手带头出门口，其它团友同我地都纷纷离开上车等翻广州~~`导游无奈，只好同场方赔钱吧，当日白做鸟……~~`

翻广州途中，全陪嘅果个兼职导游同团友道歉，讲翻D安慰说话同道别，车上嘅人都无晒声出，又无掌声鼓励，搞到气氛好尴尬~~唉~~我都唔知点讲，毕竟喺兼职无经验都唔怪得晒嘅……但令我最佩服嘅喺团里面嘅一个西人（鬼佬），遇到咁嘅烂团佢都可以全程笑容满面，好开心咁享受今日~~`

到咗广州，我地自己几个去基立下道粗饭馆食埋个晚饭就各自归家，翻去抖咗下冲个凉又再继续GOLF蒲到两点几~~`哇呵呵……

总结：勇士漂比猛士漂安全，无咁激；勇猛漂就喺勇士猛士两条加埋漂全程，唔怕死又好体力嘅朋友可以去挑战！~~`仲有就喺，参加旅团，有咩不满都尽量唔好随便发泄啦，影响埋其它团友就唔好嘛，要一团和气~~`宽容接受，好似个鬼佬咁~~`^_^

报道到此，多谢收睇！

PS:你地以为我好似之前咁会贴相呢……哈~~无啊！唔俾你睇啊！~~`呵呵~`讲笑呢，因为太赶急啦，亦都无袋相机~~`时间又少所以无影~~`

------