[游记]丹霞山之行

啱啱過左既星期五、六、日~我同媽咪同daniel參加左一個清遠韶關三天團~係daniel送既生日禮物~真係好難得佢可以忙裡偷閒玩幾日~因為佢實在係好難請到假~所以真係要多謝佢喇~ 第一日早上7點喺尖沙咀中間道集合~好耐都冇試過晨咁早5點幾起身~只係瞓左3、4個鐘頭~不過好彩我地第一日主要係搭旅遊巴直踩清遠~所以喺車上有大把時間補眠~經過好幾個位於深圳既shopping點~中午喺從化食個lunch~下午3點左右就到達我地第一日下榻既地方「清遠聚龍灣天然溫泉度假村」~我地有半日時間可以去浸村內各式各樣既溫泉~每個池都有唔同溫度同埋治療功效~講係咁講~我都知大陸係冇真係溫泉~不過嗰度都尚算新淨~所以都玩左成個下晝~晚餐係酒店自助餐~當然係中式啦~野食就一般啦但係優點係refill得快~起碼唔洗同人爭先有得食啦~

導遊話黎到清遠緊係要試下lee度d本地野~所以話可以幫我地訂新鮮熱辣既清遠雞做宵夜~成$68一隻~個導遊話d雞唔係好大隻架咋~可以一個人食一隻~但係我地又點會咁衝動呢~所以我地三個只係訂一隻試下啦~10點半睇完溏心d雞就到左喇~(冇錯!最開心係收到香港電視!)隻雞真係熱辣辣標晒煙喎~一試之下發覺隻雞唔係唔好味~但係就煮得耐左d鞋左d囉~當然最後我地都食晒成隻雞~好彩冇聽佢老點一人一隻唧~

第二日7點morning call~落酒店樓下食番同尋日晚餐一模一樣既野做早餐後~又繼續我地係行程喇~不過好可惜天公不造美~今日竟然落雨~當我地到達乳源大峽谷既時候大雨到行唔到~本身天氣好既話我地會行落谷底望番上去睇個瀑布同埋另外一d景點~但係冇辦法啦~落去條路好斜加上天雨路滑就更危險~所以我地只好圍住個峽谷邊邊走一圈~有機會下次再黎過啦~

之後又要搭長車程入韶關喇~食完晚飯就番酒店~好彩我地入住既金源大酒店喺正市中心~行過幾步就係步行街~所以我地放低d野就出去行街喇~其實大陸真係冇咩野值得買~我地都係去超市買零食同野飲~仲去左導遊推介既姊妹粥店食宵夜~講開lee間粥店呢~我地開頭行過左都唔知~只係見到有間舖頭放左兩大烹粥喺門口攪下攪下~(嗰陣時仍然落緊雨)我仲同我媽咪講d雨水咪好易滴晒落去d粥度囉~點知行遠d先睇到佢個招牌~就係導遊介紹既姊妹粥店~不過既然一場黎到~又咁啱比我地搵到~而且lee間粥舖確實係生意好好人頭湧湧~咁多人食~都應該冇事既~所以我地都膽粗粗入去食宵夜~我地叫左一碗水餃麵、一碗皮蛋瘦肉粥、一碗綠豆沙(仲有5隻我最喜愛食既鵪鶉蛋)同埋一個嗰度先有既招牌菜色「酸辣腸粉」~d野食真係幾好食~個酸辣腸粉仲好過癮好特別添~但係最驚嚇都係埋單嗰陣~加埋晒承惠$14.5~oh my god~平到你驚~

最後一日行程呢就係行丹霞山風景區喇~天氣亦都好番d冇再落雨喇~本身諗住好好行下山~點知同團既香港人個個都唔願行~個導遊又懶~是但行幾個景點就收工~唔好話行得勁少地方~直頭連講解都唔多句~真係激氣~其實嗰度既風景好靚架~得一個上晝根本行唔晒~本身諗住參加行山團行下郁下減下肥~點知而家磅數不減反增~下次揀團都係要小心d~

新增回應