[游记]庙街文化攻略

異族服飾與擺設

自上篇‘雀巢鳩佔 塔羅當道 廟街變卜街’之後,第二篇將會講下更多由‘外移內’嘅異族文化!!

原來除咗我地之前所講術數、占卜一類外,仲有好多嚟自唔同種族嘅外來文化已經入侵咗廟街。

唔知大家落廟街嘅時候有無發覺,果啲賣民族服飾嘅鋪頭越開越多,當中有嚟自唔同種族嘅,但主要都係尼泊爾、泰國、西藏、印度等等,好有地方色彩,就算唔係MADE IN當地,啲設計、款式同用料都基乎同傳統嘅一模一樣,而且價錢平仲有得講價,真係無得彈!!

講番舊陣時,廟街除咗食市同平民舞廳之外,賣嘢嘅主要就只有夜冷鋪同雜貨店,頂多都係夾雜住賣古董嘅鋪頭(唔知堅定流…),又或者大量嘅彷古董街邊檔(肯定流…),對比起上嚟,絕對無而家咁多姿多彩,家下唔止保留原有嘅特色,仲俾人一種東西溶合共存嘅感覺,而且大部份都係圍繞番東亞地區,總體上好亞洲Feel!!

除咗民族服飾多咗之外,另一種就係同有宗教有關嘅店鋪,例如嚟自泰國、西藏、印度等國嘅佛牌、神像、用品,依啲鋪頭多數都係由當地種族人仕開設,位於大街嘅兩傍行人路,喺雜貨攤檔嘅後面,有啲都幾隱蔽,不過都要搵都唔難發現,因為佢地係廚窗嘅陳列品同其它有好大對比,有啲仲會標榜來源、創造者同神奇功效等等,真係信不信由你!!

唔講唔知,係廟街嘅外來種族入面,來自尼泊爾嘅佔咗當中間大多數,有唔少店鋪都係由佢地開設,種類仲好繁多,有食、有玩,唔經唔覺真係會以為自己去咗一條尼泊爾村落。

另一方面,從我身邊嘅老外朋友打聽到,佢地都對廟街裏面新興嘅小數民族店鋪表示歡喜,仲話歐美咁啱興緊一股東亞風,所以對上述啲貨品飾物都極之喜愛!!

廟街時至今日,仍係然一個極俱特色嘅旅遊店,更係一個香港地嘅icon,你話唔講點得!!仲有,大家以後想行小販檔攤嘅時候,唔好淨係識去旺角嘅女人街(西洋菜街),唔淨在行多少少,去埋男人街,女人街有嘅嘢男人街一樣有,男人街嘅嘢女人街卻未必會有!!

p.s. 由於廟街嘅性質同旺角嘅女人街相似,而落廟街嘅又以男性為主,所以亦以有人稱廟街做‘男人街’。