[游记]成田ゆめ(Yume)牧场游记(上)

引用檢舉成田ゆめ(Yume)牧場遊記 (上)

網誌分類：國外遊蹤 |

圖片Video

網誌日期：2007-11-16 18:44

自今年五月去過Mother Farm後, 好耐都冇近距離接觸過大自然. 咁啱今次日本Layover天朗氣清, 氣溫適中, 實在太適合去郊外地方喇! 好開心今次同行有同事J. 我哋冇晨咁早出發, 只係搭10點酒店車去成田站, 轉JR電車去滑河站, 再搭由牧場提供嘅免費小巴前往目的地. 車與車之間嘅接駁時間啱啱好, 由酒店出發起計用咗1個鐘多啲就到, 認真順利, 睇嚟我已經擺脫紐約黑仔嘅宿命. 我哋每人俾1200円(約$80港幣)入場費後, 就詳閱園內指南, Plan遊玩嘅先後次序. 見搾牛奶11:30開始, 就衝過去. 去到已經見到一大棚小朋友(好細丁應該全部唔過3歲)俾Daddy/Mammy帶住排隊. 由於佢哋唔識用力, 搞到用好多時間先試搾成功. 結果我哋等咗成半個鐘先試到, 曬到乾晒!

唔知喺隻牛嚟講呢個係咪一個不愉快經歷呢? 無論個工作人員牛奶妹點出力拖, 佢都唔肯行過嚟埋位, 我終於親眼見證牽牛上樹呢一詞; 隻牛仲一副不情願嘅樣子, 一上到’刑台’就扔低一篤蘇州X; 而且被人試搾時, 左眼一直流眼水/淚? 總之就俾人感覺好可憐. 好在我冇俾苦佢受, 牛奶妹讚我做得好好叻! 梗係啦! 呢個唔係我第一次嘛! 訓練有素, 絕對Professional.

之後我哋已經受唔住誘惑食牧場推薦嘅雪糕, 我哋試咗曲奇呍呢那味. 嘩! 真係意想不到咁好味! 味道甘香清新, 比以盛產乳製品出名嘅北海道有過之而冇不及. 喺賣嘢食小木屋附近有笪空地, 嗰度有啲細個成日玩嘅遊樂設施. 我哋好似啲細路咁周圍彈周圍玩,感覺好似時光倒流咗咁, 忽然覺得自己好天真爛漫. 如果可以間唔中做番細路, 都幾好吖! 牧場裡面顧名思義有豬仔, 兔仔, 羊仔, 馬仔同禽鳥類等等. 估唔到係, 可以睇到一對咁鬼得意嘅馬仔, 好似鋪頭裡面賣啲毛公仔咁. 而且佢哋好似乖BB咁, 靜靜哋又唔多郁. 真係好想行埋去攬實佢哋呀!!!