[游记]大阪,路,神户,京都,白,胜浦.

Re: 大阪,姫路,神戶,京都,白浜,勝浦溫泉美食第一次自駕遊返嚟喇

由 AnitaCC 發表於 週五 10月 19, 2007 1:21 pm

Day 3 (8/10) 雨後轉陰天

今日好早就起身, 第一件事梗係望吓天氣下如何, 嘩:evil: 唔係咁黑仔呀, 琴日又曬又熱, 依家落頗大雨, 即時心情趺落谷底 , 叫做正式開始自駕遊嘛, 唉食咗早餐先算啦, 由於7點半太早好多餐廳未開, 而且雨都幾大所以近近哋過對馬路間cafe食, 大家唸住check-out咗睇吓點再作決定. 當大家忐忑不安地準備出發嘅時候, 好幸運地停咗雨只係天灰灰, 我哋即刻火速 向toyota出發.

到達toyota辦好手續, 由於大家都係第一次响日本租車, 所以老公同團員B君都好細心聽職員講解GPS點用, 決定先由有車階級團員B君先楂, 攪咗一大輪終於向第一個景點 “姬路城” 出發. 由於遲咗出車兼原來日本高速公路唔係想像中行得咁快, 比我原先計劃10點前到達有啲出入, 泊好車都已經過咗10點半, 唯有打電話同有馬太合之湯改時間啦, 其實我係想訂有馬Grand Hotel之日歸溫泉不過由於日本假期關係一早已full, 後來見到太合之湯有個plan係包一間房食飯兼休息3小時加任浸溫泉只要YEN6000都唔錯, 再追加三田牛共YEN6700, 所以book呢間囉. 點知嗰度啲職員聽唔明英文 , 話冇我個booking而且日歸唔使book, 雞同鴨講咗一輪 最後唯有放棄.

姬路天氣都係麻麻地, 不過唔落雨對我哋嚟講已經lucky喇, 然後便以快速步伐進入姬路城参覲. 由於冇時間慢慢行, 所以只係選擇怏線去天守閣. 其實行啲樓梯頗吃力. 好彩天氣涼爽唔使汗流浹背, 大約用咗1個鐘参覲完畢, 立即趕去有馬溫泉, 不過一上車肚餓又發作, 好在早有準備 ~ 焼きたてチーズケーキ cheese cake, 味道唔錯.

經過一輪快駛都要1點後先到達有馬溫泉, 太合之湯嘅停車場差不多全滿, 下車即感覺到陣陣秋涼, 唔理三七二十一衝入太合之湯, 我怕冇lunch食因網上話中午食事時間最遲1點鐘, 職員話冇問題叫我寫名登記, 點知一寫就發現booking lists上有我個名, 佢哋一早已經準備好飯餸响房間內, 如果之前個職員聽得明我哋講嘢就唔駛食凍飯啦, 激鬼氣 ! 食飽飽响間房內玩吓按摩椅, 休息吓跟住係重頭戲 ~ 浸溫泉. 日本人真係好鍾意假期去浸溫泉, 入到去沖身地方爆曬棚, 太合之湯有好多唔同類型風呂, 個人覺得比較特別係炭酸湯, 佢會有好多小氣泡粘住身體, 而且好多效能仲講專比高血壓人浸添, 所以最受歡迎任何時間都迫滿人, 另外有3個獨立湯, 係一個木桶一個人浸啱啱好, 我同團友J小姐浸到不亦樂乎, 差不多要1個多鐘頭才可每樣都浸吓, 由於只有4小時free parking, 我哋4點鬆啲就走喇.

下一站係先去神戶Daiwa Roynet Hotel check-in, 然後去多個景點再食晚餐. 今躺由我老公揸, GPS顯示只有20km, 大家唸好快啫加上行有料高速, 真係唔駛10分鐘就到, 但大家左望右望都唔見間酒店, 附近似普通住宅區, 唯有再重新輸入GPS啦, 但佢又再帶返原先度, 如是者試咗幾次都一樣 , 打電話比酒店問英文又唔掂, , 好彩我有印定酒店嘅地圖, 最後要用人腦搵, 卒知搵到不過已經由天光搵到天黑, 唔可能再去其他景點囉. 點解住呢間酒店, 貪住佢新, 張床有154cm, 價錢唔貴(YEN8000), 但唔知係咪間酒店太新呢, 所以GPS search唔到??