[游记]西安游记

June 27

西安遊記

早前去完西安玩左四日, 早去晚返。

今次跟關鍵去, 團費超值, 開頭諗住行程同食宿都會麻麻, 點知錯哂, 係出奇地好喎。

好啦, 先由第一日講起啦。

我呢個團係要係深圳出發既, 領隊約左7點鐘係尖沙咀中港城碼頭集合,

先坐船去蛇口, 再去深圳機場坐飛機。我同豹仔哥當然唔會咁蠢啦,

因為我地知道班機成1425先飛, 如果我地經羅湖自己過去,

可以9點起身之餘仲可以飲個早茶, 真係正。

原來深圳上機有一個好處, 就係你可以係起飛時間前一個鐘到機場就得,

因為Check In加埋Boarding既時間都唔使半個鐘, 快到~

加上機票又平, 我地張飛去西安既機票來回都係$360, 勁抵。

好啦, 好快就飛到去西安個機場啦, 我地差唔多1715到埗,

落左機就去會合個導遊同埋搵我地架旅遊巴, 架車好靚, 係中型車黎既, 橙黃色,

几新, 冷氣又充足。我地先返酒店沖左個涼, 再去東來順涮羊肉。

的野食又几好味喎, 仲有好多鮮甜的菜, 聽聞係東來順自己種既。

食完黎到西安既第一餐, 都差唔多9點, 我地就去左市中心睇0個個音樂噴泉,

都OK靚, 影左的相, 就返酒店啦。

我同豹仔哥梗係唔會咁早返去啦, 於是走左去酒店附近個條街度食串燒, 堅好味,

仲要勁平, 牛肉1蚊3串, 羊肉5毫子1串, 食完仲要唔會肚痛。

食完野, 再去超市買左的野食同野飲, 跟住就返酒店啦。

第二日7點起身, 8點鐘出發, 先去左個做兵馬俑既工場睇下呢的咁既公仔係點整既,

跟住循例又畀你睇下的製成品, 當然係想你買啦。之後就真正去睇兵馬俑博物館啦。

嘩!個度真係好Q大。總共有三個展覽館, 第一個係最主要0個個,

0的兵馬俑一排跟住一排, 真係好Grand。

我最鐘意就係睇呢的咁既中國歷史遺跡, 每次都覺得好震撼,

雖然我對歷史冇興趣, 讀中學時又Drop鬼埋, 但原來歷史入面既故仔真係好得意,

仲要加埋的野史, 配合埋的遺址, 真係好似睇緊電視劇咁,

我即刻諗起秦俑同埋王菲有隻講秦始皇但唔記得歌名既歌。

睇完兵馬俑, 就係個度食埋個午飯, 今次仲係記得食左個好特色叫做"褲帶麵"既野,

酸酸地, 都几好味, 之後原本諗住返去買個套價值5蚊既兵馬俑公仔, 一套有5隻,

超抵, 之前應承左公司個同事話買返黎, 但最後都放棄左冇買度, 因為太重, 費事拎。

跟住我地去左參觀華清池, 就係當年楊貴妃沖涼既地方,

導遊奧雲仔話我知, 原來楊貴妃係有臭弧既, 所以要成日沖涼。

天氣真係熱, 之後再去左睇大雁塔同埋慈恩寺, 都唔係太特別, 成個中國都有得睇既野。

夜晚食完飯, 本來係冇節目既, 我地叫導遊車我地去行回民街,條街好多野食, 勁多串燒,

仲有的乾貨賣, 咁我就象徵式買左几盒野, 諗住返黎做手信, 都几好味架。

由於導遊話畀我地聽行哂行程表上面既野, 仲會多出一日半既時間,

咁我地就加遊左兩個項目, 就係上華山同埋去睇漢陽陵, 前者係豹仔哥最想去既,

後者就係我既飛佛, 因為我最鐘意睇陵墓, 係堅鐘意, 不過咁就畀多左$480蚊人仔。

於是第三日一早, 我地就上左華山, 不過天公麻麻地做美, 個日落住毛毛細雨,

不過咁都不減我既興致, 仲好啦, 冇咁熱。我地先坐架登山Van仔去到山腳, 再坐索道上山,

唔使10分鐘就上左成千呎。落左車之後仲要行既, 行多一陣就可以上到北峰頂,

個度係當年唔知邊個用黎"華山淪劍"既地方。

因為太早起身, 所以冇食早餐, 好在山頂有得食酸辣粉皮, 好好味, 食完我地繼續爬天梯,

日月崖等等, 行行下又口痕, 又食左隻茶葉蛋, 豹仔哥再Encore左碗酸辣粉皮。

導遊話如果要行埋東南西峰, 起碼要行多一日半。不過呢個山既風景又真係OK優美。

行完華山, 落番山腳食飯, 個時已經係下午兩點几, 食完飯返番酒店, 車程要兩粒几鐘,

返去沖個涼, 又話食晚飯, 食完飯之後有四個團友去左睇仿唐歌舞show,

其他人就話想再去行回民街, 咁就去行啦。

除左個條街, 圍住鐘鼓樓廣場仲有几條街可以行, 分東,南, 西, 北大街。

好大雨, 我地去左Starbucks飲Coffee,呢個已經做左我地去旅行既指定動作。

行多一陣就返酒店附近Dub骨, 几抵, 最平30蚊Dub 80分鐘,

我揀左個50蚊Dub腳同身, 100分鐘, 唔使畀Tips。

我睇過如果Dub邪骨都唔係好貴, 150蚊有交易, OK抵。Dub完好攰, 返酒店眠。

講下講下又黎到最後一日啦, 早上去左睇清真寺同埋古城牆, 食個午飯,

去左睇全個Trip我最感興趣既野,就係死人野, 漢陽陵。

個日落雨, 加上天暗暗,入面都几可怖。

其實重點就唔係睇個墓既, 因為Actually都只係一大個山頭, 睇唔到佢條屍架。

個度既地底有一個用玻璃圍住既漢朝兵馬俑博物館, 環境黑蚊蚊,

佢既特別就係在於用左好多塊每塊價值26萬既玻璃佈係地面, 而下面就係出土既兵馬俑。

個度既俑都唔係士兵黎既, 係人黎既, 全部都細細個,仲要係有顏色,我叫個的做人仔俑,

因為佢有男有女, 仲有宦官, 即係太監, 超得。

其實個度有好多野睇, 可惜我地趕住坐飛機走人, 所以睇左個零鐘就閃。

最後飛返黎深圳, 再坐埋車返羅湖, 咁就結束左四日之旅。

總括黎講, 呢個團係超抵玩, 因為我地住既係五星酒店, 張床几舒服, 冇鬼,

浴室仲有浴鹽畀你沖涼同浸腳, 唔錯唔錯。

食個方面, 我地全團24人, 食飯分3圍枱坐, 每餐都有成十几廿碟餸,

次次都食唔哂個隻, 飽到嘔。

三千蚊就可以Play四日, 你仲唔快的行動。

< 完 >