[游记]西安游记

June 26

西安遊記 I

正如出發前所講，今次既旅程體驗真係十分之多，

亦都係我一次最實在既旅行，所以今次亦罕有地係每一日寫上遊記，

記低係呢10日裡面既一些小事大事，所見所感，

仲有要多謝幾位朋友嘉杰、占士、玲一路上既安排及照顧，

有機會再一齊向第二度出發！

《華山篇》

6月12日 晴

可能係因為今次既目的地較偏遠既關係，行前準備亦都比較足，買大褸買大袋，旅行味十分重，行李一執就執到凌晨4:00有多，早上7:00起床，匆匆忙忙洗個澡便出門，幾位朋友約定於9:30關外集合，9:00未夠便急不及待跑到關外，9:30人齊了，便正式向西安出發。

乘直通巴士2個半鐘到達廣州火車站，火車於14:13開車(火車票5日前於拱北購買)，由於時間尚早，到麥記食個晏，坐左陣，又係時間起行，上火車了，開始廣州至華山25小時長途火車。

在火車上

起初有點擔憂，25小時，話長唔長，話短唔短，但傾下計，玩下牌，食下野，時間又並非想像中難過，碰巧車上遇到一位老大哥，說到旅遊就停唔到口，又介紹我地好幾條旅遊路線，於是我地就以此作參考，到晚上10:00許，火車上的燈都關上，唯一可以做既就係訓覺。

* 火車上既時間並唔難過，最緊要係有朋友吹下水，玩下牌，有時仲可以靜下，睇下風景，諗下野，蠻不錯的！

* 有機會搭火車記得帶定一支空氣清新劑，車上煙味汗味還算小兒科，但有一種味就唔係個個頂得緊 >> 腳臭味

6月13日 陰

5:00未夠醒了，發下呆，食個杯面，玩下牌，再睡一睡，就到達華山了。到達華山後，我們就隨即坐車並被介紹到華山腳的一家旅館投宿，$100標準間，心想比我們預計便宜，可以接受，便入住了。

由於幾位朋友一早有了覺悟要摸黑上山，所以我地決定左於11:00多出發，但由於還是下午，時間尚早，我們就到附近打聽一下，順道食個晚餐，膳後回旅館休息一會，準備夜探華山。

6月14日 晴

夜探華山

黑媽媽爬山，真係諗都未諗過，為的就要一睹華山一剎晨光，結果我地就係13日晚上11:30出發，直闖華山。到了華山腳後，雖未至於空無一人，但亦寥寥可數，此時有一對穿上情侶裝的情侶直奔華山入口，我們隨即上前打聽，並提議結伴一同上山，多個伴無妨吧，而呢位女友人原來是攝影高手，沿途過了我好幾招黑夜拍攝技巧，真係感激不盡。由於距離日出時間不多，只有5個多小時，我地就馬不停蹄，又行又爬，爬了2個小時，到了一個小賣站，見到毫不起眼的西瓜，各位意見一致要征服佢，不知是否華山既西瓜特別好吃，吃得我們津津有味，席間，問到站長還有多少腳程才到達觀日臺，他說我們只走了3分之1，糟糕！此時已半死的大家只好又繼續趕路，沿途一路都有很多志同道合要去看日出的登山者一同上路，個個目標一致，你一句加油，我一句努力，氣氛十分之好。如是者一路行一路爬，又走多3個小時，兩隻腳已經唔屬於自己似的，而還有最後既1個時間路程基本上係靠意志去走的，雖然最後我趕得切係日出前一刻到達海拔2100米既觀日臺，但由於大霧關係，最終都看不清日出，飲恨而回。

辛苦過後，我地就停下來，食盡所有帶來的乾糧，食飽後，占士決定要再創高峰，然而我、嘉杰及玲已疲倦不堪，體力不支，但占士去意已決，我地就決定分道揚鑣，於是我將相機借給占士，寄望佢影一些靚相回來，分手後，我們三人隨即下山，下山沿途既風景真係嚇我一跳，由於整夜摸黑上山，並沒有留意四周，原來一路上山的兩旁竟是懸崖峭壁，於是我地就係下山沿途影了不少靚相，總算不枉華山此行，期間不幸既事發生左，占士既一個來電，“你的相機完全不能動”簡直有如晴天霹靂，天呀，才第三天，往後七日我點算呀，心一直悶悶不樂，3個多小時過去，我們約定係半山索道口集合，乘索道下山，差不多3小時既腳程坐索道竟不用10分鐘，頂！如是者我地就下山回旅館吃中午飯並取回我地既行裝。吃飯期間，我用盡辦法為我的相機進行搶救，未果，於是我就提議將行程改變，先到西安為相機急救，再到秦始皇兵馬俑，就係呢個時候，手上既相機突然反應了一下，接著完全回復正常，我高興極了。

接著我地隨即坐車前往一個叫臨潼既地方，準備翌日一早去秦始皇兵馬俑，到達臨潼後第一時間找旅館，見時間尚早，出外走了一趟，發現了今次旅程中最好吃既一樣食物–肉夾膜，之後再到西安科技大學走了一圈，再晚飯網吧，是日完，下回待續…

*通宵爬華山雖然辛苦，但體驗不少，風景亦不錯，難得！值得！

*每個人都有唔同既價值觀，意見亦都唔一樣，係團體裡面要懂得點樣去包容，點樣去接受意見！