[游记]西安游记III

July 15

西安遊記 III

《太白山歷險篇》

6月17日雨

這個太白山行程安排在壓軸登場，可想而知我地對佢既期待有幾大，但天公不造美，早上已下起雨來，整個太白山行程充滿著懸念。一早5:45起身，刷牙、沖涼、洗面，早餐都趕唔切食就要到西安汽車站，趕搭7:30到眉縣既公車，公車上環境起初都不算甚麼，但人來人往，前排的人又不斷抽煙，之後就惡劣至極，坐車途中一直都有一種不安既感覺，於是就打左今次旅程中既第一個電話返屋企，老豆返左工，呀媽剛起身，表面係報平安，其實心裡面有著種種憂慮(因每年年中都總有幾宗太白山致命意外)，一路上經過很多窮鄉僻壤，雨沒有停過，2個半小時既車程並不好過，到達眉縣了，在某處下車，四圍人不多，只一兩個，我地就問去太白山山腳湯峪既方法，路人甲話我地知要坐巴士，又剛好有巴士，即上，坐左一陣就到了太白山山腳湯峪。在湯峪我地四圍打聽山上的資料，仲食左碗淨面，呢碗係繼昨天晚上既又一碗面，打後兩日都只會食杯面，呢云變左做苦行者。

出發了，我地包左一架的士開始探索太白山，起初都無乜野，10分鐘過後由於山路崎嶇，開始見暈車浪，沿途坐車上山大概要一個鐘，司機都好識做，去到靚景都停一停車等我地影相，但我地就要冒雨咁影，不過都值得既，靚景喎，一路上上到海拔2800米，一落車，不得了，外面既溫度只有10度8度，更糟係雨仍下著，大家都即刻穿上早已準備既外套，之後就乘索道上山。太白山索道還真算簡陋，恐怖極，15分鐘既索程，有如玩跳樓機，唔知佢幾時會跌落離，終於到站了，再步行半小時，我地見到一間頗簡陋既鐵皮屋，裡面有一些髒得很既房間，雖然難頂，但又恐怕再繼續往上爬沒有住宿的地方，於是只好投宿，當時只係下午既4:00，由於往上爬一來一回已天黑，我地就留係呢間屋，4:00呢個時間真係好尷尬，現在訓覺又怕晚上訓唔著，唔訓又凍又無野做，於是我地迫於無奈買左副牌，先來一個太白山四人牌局。而成日流流長，人當然有三急啦，要上廁所，每當去大陸既廁所我都有所覺悟，要“一口氣釋放 ”，但呢個廁所，根本就唔係人去的，惡臭程度達十級，滿地都係 ，中國人口口聲聲話要進步，好心就攪好個廁所文化先啦，唔該！晚上7:00多我地就開始食我地帶來既杯面，食飽後，趁熱量還未散，8:00多就隨即準備上床訓覺，係呢張又臭又濕又髒既床上面，我竟然唔使一分鐘就昏迷左，勁呀!

* 呢一日其實充滿著不安、不適同埋不快，真係有苦自己知…

6月18日雨

(呢一日真係特別多經歷，大家真係要落足眼力咁去睇喇)

由於天氣極凍既關係，龜仔就好似凍眠咁，一訓就訓左10個鐘，早上還少有地不願起身(通常去旅行我會係最早起身哥個)，由於帶來的杯面昨天晚上已被解決，我只好以幾倍價錢買左個大陸名牌康師傅紅燒牛肉面，雖然不太好食，但點都要食少少熱野落肚先有力繼續爬，早上天氣比昨天更寒冷，縱使不想也得租一件軍大衣，呢件軍大衣保守估計10年以上沒有洗過，又重又臭又髒，真係不得了。有了上次上華山既經驗，往上的路並不好走，所需體力都好難想像，呀玲決定留下來，由於對山頂既了解並不多，我地定左2個方案，情況許可下會即日折返，如不許可也許會在山上紮營露宿一宵。

生死一線

本來最期待既太白山登頂之旅，就係因為一場落過不停既雨而變成最危險、最沒趣既行程，終於要出發了，我背著一個10磅重既背包、一件10磅重既軍大衣開始挑戰死亡(我的同伴亦然)，起初都還算可以，只是一級一級上，行下停下，期間我地一直被大霧包圍，外面的景色全都是白蒙蒙一片，行左差不多兩個小時，我地由旅館既3200米行到3500米，諗住都無死啦，差2百多米就可以登頂，我地繼續行，之後我地到左一條路，簡直就好似通往天國咁，兩邊係懸崖，前面就白蒙蒙(下面有相睇)，正當我地係度影相之際，有位呀哥行由後面一路行上來，行得頗快的，似是當地人，於是我地就諗住跟住佢，不知不覺就進入左一個叫石海既地方(一個呢世都唔會忘記最接近死亡既地方)

石海驚魂

石海係由無數既石形成的山坡，呢度沒有一條開墾過既路，要通過就只得踏在不同的石頭上，一步一步的走，行左一陣，呢位呀哥同我地講：想跟住來就快點吧，石頭不滑的(咪玩啦，我差點滑左落3千幾米懸崖下，你同我講唔滑!?人命來架!)，之後談到佢帶我地到山頂，我地就支付佢60蚊，佢應承左，之後繼續行啦，佢竟然講：大家小心，石頭好滑，小心慢行(我真係頂你唔緊，你唔好再現實D!? )，一路行一路行，行左兩個小時有多石海，都仲未行完，期間滑倒了兩次，差點跌左落山，心一直諗現在所行既路到落山時都要再走，最慘係身上那件10磅重既軍大衣由於一直下著大雨已變成廿幾磅，如平安無事落返山就已經係萬幸，再行左大半個小時，終於走完石海呢段路，到達一個叫文公廟既地方。

抉擇

來到文公廟既一所鐵皮屋，我地就放低身上既超重負擔，抖一抖，因一直行行左差不多6小時，沒有食過野，加上件軍大衣，體力已不勝負荷，我地就食返一些帶來既朱古力、餅乾，跟住我地就問帶路呢位呀哥還有幾耐到達頂峰拔仙台，佢話還有差不多兩個小時，而當時已差不多中午12點，此時，嘉杰因天氣寒冷及種種原因提議下山，而占士似乎沒有氣餒，的確，還差少許就可以登頂，若此時放棄，真的很可惜，但衡量當時既環境，糧食少，體力少，精神少，全身濕透，鞋入晒水，加上若再往上走就不夠時間即日折返，要在山上多待一天，種種因素，我都認為下山是比較恰當，卒之我地就放棄左登頂，決定折返，於是就要求帶路位呀哥帶我地落山(因為自己走是很危險的，稍有差池，有機會會迷路、凍死、跌死的)，係呢個時候呀哥就食住個勢，獅子開大口，要200蚊才肯帶我地落山，不過無計啦，為安全起見都要應承，落山的步伐輕鬆多了，但路依然係咁危險，件軍大衣就越來越重，行左4個多小時，終於回到今早出發既旅館，總算有點安慰。

回到旅館，我二話不說咁除左件軍大衣，鬆晒，再食一些乾糧，生理滿足極，心理就其實從尋日開始到呢一刻，沖熱水涼既慾望越來越濃烈，無野比沖熱水涼更重要！而我地四人又再回合了，當我地係山上歷險期間，原來呀玲都在歷險中，話說她獨自在房裡，有個呀叔對佢虎視眈眈，曾敲門搔擾，好在最後有驚無險；現在時間許可，我地又定了兩個方案，一是若下山後還有車到西安，我地就直接回西安，二是若下山沒有車，我地就留在湯峪(還記得嗎?)住宿一宵，浸返個當地出名既溫泉。跟住就向山腳出發。

下山都唔係話咁易

我地沿路行半小時到索道站口，見到成班人係度捉棋，嗌極都無人“塞”我地，事關今日一個遊人都沒有，索道停駛，要打電話落山下面叫人開索道總掣先可以落山，等左廿分鐘，索道終於開著，此刻有點怯，實在太兒戲了，乘左15分鐘到站，我地需坐出租車落出腳，但奈何呢個時間同呢個天氣，根本就沒有出租車，但好在我地見到架旅行團小巴，我地走上前問佢可唔可以順路載我地落山，司機一口答應了，但就要等埋其餘團友才開車，諗住無死啦，於是嘉杰同占士就上車同車上既人吹下水，打探到原來呢團人係來自山西旅遊局，齊人了，誰不知忽然間殺出個旅遊局局長，他說因為安全理由不能載我地落山，擾攘左大半個鐘頭，最後呢個不知所謂既局長都堅決唔車我地(之所以話呢個局長不知所謂係因為堂堂旅遊局局長，唔車幾個學生仔，而呢幾個學生仔最壞可能性係會凍死係山上)，好在我地命不該絕，個司機幫我地聯絡山下既同僚，開架的士上來車我地，但收費就要雙倍計算，不過無計，再貴都要應承啦，之後我地係山上呆等左1個小時有多，的士終於到了，之後我地坐左1個多小時就落到山腳，落到山腳已經差不多8點，但司機話仍有車到西安，於是佢就車左我地去一個公路旁邊放低我地，我地又一次做電波少年，係公路伸手截車，截左半個鐘終於畀我地截到一架回西安的豪華巴士，不得了，晚上11點多我地就返到西安我地之前入住既秦飛大酒店，有命回來真係要謝天謝地，放低行李後，一定要食返餐好既(呢個時候邊個阻我交都有得打，講笑)，即刻落去最近既肯德基食左餐勁既，之後返酒店遂個洗白白，我當然係沖最尾啦，因為次次沖涼沖得最慢哥個都係我嘛，加上係太白山返來，兩日無沖涼，要幾污糟有幾污糟，呢晚我沖左足足一個小時有多，死未!

仲有3日，下回分解！

* 未到太白山之前根本無諗過會有咁深刻咁危險既體驗，去完發覺自己並唔係想像中咁唔捱得苦，訓得就唔在講，食方面淨面可也，體力就更加不得了，能走畢全程已經算唔錯，污糟、惡臭樣樣齊，一字記之曰：忍！

* 一連去左華山同太白山，但好遺憾始終都見唔到我最想見既雲海，唯有寄望下一次既雲南雪山吧！

* 係度真係要讚一讚我部相機，雖然山上只得幾度，橫風橫雨，手機都凍到用唔到，但佢依然靈活自如，影既相一樣咁靚，介紹大家CASIO Z系列，正！

* 呢個太白山行程學曉左一樣野，係大陸交通絕對不是問題，只要去問，交通接駁還是可以的，絕對死不了！