[游记]西安游记II

July 04

西安遊記 II

《西安古都篇》

6月15日晴

上回講到我地係臨潼投宿，第二朝一早我地就出發到西安線必遊既秦始皇兵馬俑，坐車20分鐘唔夠就到左，隨即購票入場，經過一個好大既樹林同廣場，所謂既世界第八大奇跡就係眼前，好大既坑裡面有好多既士兵同戰馬，跟教科書上看到的一模一樣，場面勉強說是壯觀，但說它是奇跡又有點兒那個，又一次，中國人既吹噓又一次出現係眼前，卒之我地行左兩個鐘，參觀左3個坑，看罷我地就乘車返回旅館取行裝，準備到西安去，臨走前，我地都要再一次品嚐激正的肉夾膜，簡直係回味無窮。

差不多一個小時，就到達西安，再轉巴士到市中心，到市中心後我同呀玲就係一間郵政局等候，嘉杰跟占士就到附近找合適既旅館，等左差不多半小時，結果佢地找來一間叫秦飛既酒店，四人間，180蚊，位置及環境都不錯。我地放低行李後就隨即計劃西安既出遊路線，之前搜集所得既景點都幾多，但點與點之間距離又不是很遠，於是乎呢日我地就去左鐘樓、鼓樓、回民街、碑林(後門)、南城門，話說我地去到碑林時大概是5:45，此時碑林空無一人，大門關上，只見門口有幾架私家車停泊著，我地就諗：糟糕，來遲了一步。於是我地就用一些特別效果係門口處影幅交差相就算數，之後便離去(但幾個笨蛋竟然不知道原來所到的其實是碑林的後門)。

接著晚上我地就回到回民街，打算去吃一些地道野，我地去左一間叫老四既食店，都頗為出名的，食既係西安招牌菜–羊肉泡膜，我個人對呢味地道菜評價只係一般，唔係事必要食都唔會食，席間，我腦入面只係有對廣東菜、江南菜、凍檸茶既懷念，因為呢幾日所食的都不太岩口味。膳後，我地就先回酒店，然後我、嘉杰、玲就外出四處找網吧，而占士因太累沒有出動，找網吧未果，途中見一間港式茶餐廳，就有如沙漠中見到綠洲一樣，毫不考慮就入去嘆左一杯凍檸茶同牛肉粥，正呀！而呢一晚亦都訓得特別有滿足感…

* 始終都係最愛廣東菜，咕嚕肉、梅菜扣肉，我既至愛…

* 有一種莫名其妙既不快，是我不夠主見？還是我礙手礙腳？

6月16日晴

一早到酒店下的一間小食店食早點，豆漿油條，係澳門因熱氣關係從不食油條既我，唔知係佢整得特別好食一或係無選擇既情況下，食左兩條，認真不得了。之後我地就步行到南城門乘巴士到陝西省歷史博物館，館內珍品還不算少，但我這凡夫俗子不太懂欣賞，只是略略帶過而已，而另外兩位團友就看得頗為投入，差點如癡如醉，為了不掃大家既興，我就走到一旁，鑽研攝影，自得其樂，係呢度我影左一張我自己好滿意既相(SPACE既主題相，相簿入面都有，大家比些少意見呢)。參觀完畢，由於占士約了朋友要先走，剩餘既幾位就步行到附近既大雁塔

去大雁塔某程度上已變左做例行公事，因幾位團友都有唔同程度既思鄉之情，我地將我地既注意力集中左係找尋粵菜館上，就算到大雁塔，都只係遠距離影左幾張到此一遊相便離開，回市中心途中還經過另一景點小雁塔，亦都把風光拍下了。回到市中心我地去左一間大型商場(開元廣場)頂樓美食坊飽餐一頓，之後再到一家網吧，上上網，找找之後要到的太白山的資料，等會合埋另一位團友，上網途中我和另一位團友都不自覺地昏迷左，在網吧訓覺，挺攪笑的！接著回酒店休息一會兼集合，再出發到火車站買回程火車票，由於呀玲此時有點累，此行只有其餘3人。

晚上，由於翌日就要出發到太白山，有對情侶就想撐下台腳，食返餐好，識做既我就同另一位團友到附近食左碗面，之後就自己一個到回民街買少許手信同一些乾糧預備到太白山，之後再到網吧消遣一番才回酒店，回酒店還要收拾行裝，執一些上山需要用到既野，其餘的就寄存係酒店，一執就執到2點幾，第二朝5點9就要起身，準備出發到下一站 – 太白山 <待續>

* 我是一個團體意識很重既人，很喜歡一班人凝聚在一齊既感覺

* 眼見同行既一對團友出雙入對，好不開心，真係羨慕極！很渴望有一天跟女朋友背著包四圍去，但呢D野都係隨緣啦…