[游记]西安游记-最终回

July 31

西安遊記 - 最終回

6月19日 陰

頹廢西安

一早8點多，我就先落街打探附近洗衣店既下落，之後就回酒店將所有太白山衣物拎晒去洗，再食返個豆漿油條。話說昨晚係太白山回來，由頭到腳都係好污糟好濕，所以所有野都洗晒佢，連鞋都洗埋，而嘉杰更連鞋都唔見左，所以今日第一個行程就係去買涼鞋，行左成個鐘卒之係行人隧道既一間鋪仔買到對涼鞋。其實本身可以到黃河既壺口瀑布一遊的，但由於車程來回都要用上大半天，於是我地就放棄呢個行程，一於頹廢西安城。

如是者我地就去返上次摸門釘既碑林，今次去碑林既目標比較明確，但想買一些字畫及紀念品，一去就去到中午，中午我地去返上次去過的商場FOOD COURT又飽餐一頓，下午再回碑林參觀，再睇一睇城牆之後就回酒店了，旁晚三人去了網吧，一人在房休息，之後再會合來一個最後晚餐，呢餐既目標依然係粵菜，我地仍然不死心，於是行左成個鐘去到一間茶餐廳，又食點心，又鋸扒，皆因今餐有人請，嘉杰之前係華山整唔見左我個相機袋，所以請我食返餐喎(藉口離即，我個相機袋根本就唔使錢，況且都唔關佢事)，食左呢餐飽飽地，之後就回酒店準備明天搭一早8:30既火車，西安頹廢一日遊，完。

6月20日晴

起床 >> 火車站 >> 火車

火車上

由於占士要返河南老家，中途下車，所以回程只有我、嘉杰同呀玲硬卧，車上沒有太多東西做，聽下歌，發下呆，吹下水，16:00左右，鄭州到了，於是我同嘉杰就送別占士，接著係車廂，繼太白山教大家抹車之後，今次教大家抹D，輸左就當然要服待大家既晚餐啦，結果我梗係無輸啦，“長途D王”嘛，火車中途停站時，我地就落車買左幾隻超大既雞肶，好有雪中送炭既感覺，之後晚餐，吹水，訓覺。

6月21日 晴

火車小風波

早上我地到火車餐廳豪食早餐，餐廳環境尚算不錯，但食物就…但幾唔食都好，根據我既習慣都要幫呱份早餐拍返張寫真，接著無意中畀我見到牆上掛左一本旅客留言簿，好奇一看，簿入面原來係一些問卷，於是我就如實回答，不滿意、不滿意、不滿意…填表時隔離有位職員似的呀哥同我打招呼，可能見呢本野十年唔逢一潤，終於有人填吧，醒水既我就即刻將多個不滿意改成滿意，然後掛回牆上，返回車廂，途中，見到窗旁掛左一頂公安帽，同圍又無人，於是就拿來影相，回廂不久，突然有位公安似的呀叔走來我們的廂，一隻手拿著一頂公安帽，一隻手拿著我剛才填的那本留言簿，樣樣衰衰咁，睇離都不懷好意。

接著佢就自我介紹，原來佢係火車長，即係車上最大粒哥個，不得了，咁大粒都要親自來找我地，佢聲稱親自來幫我地做一個問卷調查，心諗好在之前醒水改返滿意，問左一些問題後佢就借D耳話我好鍾意影相，問我拿部相機睇睇，睇睇下，弊！畀佢睇到我同嘉杰拿公安帽玩既相，佢就帶點陰濕咁笑笑口，跟住就走左喇。如是者我地就繼續吹水玩牌啦，誰不知過左十分鐘有另一名公安過來，對我說：車長請你過廂房一談，心諗呢云奶野，此時嘉杰衝口而出一大堆廣東話同英文，又鬧又扮唔識聽普通話，個公安好無奈咁走左，隔左一陣，呀車長又來了，今次佢好客氣咁邀請我地過廂房，由於我普通話有限，於是就梗係叫埋嘉杰一齊去，到左廂房，車長無啦啦係個袋度拔野，拔左兩張廿蚊紙，叫我地唔好介意車上難食既食物，當補償我地，仲要求我地洗左D食物相，當時既情況我覺得我地無得揀(心諗40蚊就想要我地就範)，於是我地一致拒絕收錢，但相就照洗，洗完之後，車長就好客氣咁請我地飲野，事件總算平息…之後一點多就回到廣州，下火車。

為左一圓大家食粵菜既心願，下車後我地就到左上下九荔灣廣場既一間酒樓食飯，叫左幾個菜，當然有我最愛既咕嚕肉啦，大魚大肉一番，正！食完再加多杯許留山芒椰蘆薈爽，真係從未如此滿足過，食罷坐車返珠海，再回澳。

=================全程完 =================