[游记]耆英点解过芳村

搬咗过嚟芳村之后，先发现过嚟呢度买餸嘅阿公阿婆真系好多。隧道口附近嘅中市，就系呢啲耆英最钟意去嘅地方。果度啲肉胜在够平，啲菜又的确新鲜好多，所以先有咁多捧场客！不过阿娘话，经过呢几年啲阿公阿婆咁买法，中市嘅肉菜价格已经唔系当年咁平咯！再者有啲奸商虾阿婆眼蒙蒙，经常以次充好。譬如话，鸡档可以帮买鸡嘅劏埋、掹埋毛，有啲档口就趁劏鸡果阵将你只好鸡换成差嘅！我阿婆都中过几次招啦！重有啲档口嘅嘢，食过都发现有啲问题，所以阿娘都唔系太钟意去中市买餸。

而家旧中市已经拆咗咯，新中市啲嘢嘅价格又拍得住河北，但喺买餸耆英就一样咁多。道理好简单嗟！芳村最多喺食街，饮茶食嘢都好方便，有啲茶楼8点前埋单重唔使俾茶钱，好笋啵；啲阿公阿婆坐车又唔使钱，咁饮完茶再买餸，一条龙搞掂不知几好。所以晨早流流，啲15路、71路、556路公共汽车就会载住一车车阿公阿婆杀到芳村；到9点几钟果阵，又系呢啲线路加上地铁，运送翻一班大抽细抽嘅老人家翻屋企。咁你话芳村点会唔旺啊！