[游记]暹粒五天遊之到達篇(22-26.11.2009)

正如先前所講，為咗貪平，自然要以時間來換取金錢啦，於是早早起身便坐火車經深圳上廣州，係廣州東站食過『蒙自源雲南過橋米線』(呢個唔錯，又平又食得過，勝在夠簡單)後便再打的去廣州既新白雲機場(原本可以坐機場巴士的，但想下想下覺得買機票平咗，又怕廣州塞車，所以咪又偷懶咯，不過呢一程個的士司機揸到識飛咁，怕怕)，之後當然係入閘等上飛機。

大鄉里出城，呢個機場又真係幾大，不過係遠咗少少啦，不過聽講2010年會有開通地鐵由廣州市中心直到呢處！那時便方便多了！

過程順利，好快就落機到咗暹粒(Siem Reap)，那裡地方不大，機場自然是細細的，交出20蚊，辦好簽證，一出機場便見到酒店的Tuk Tuk司機舉牌等我，經過15分鐘車程便到酒店！

我在網上預定的MotherHome Guest House(我揀呢間主要係網上評語唔錯，又新又靜，最重要就係佢好多免費服務，又平，15蚊一晚咋)

到達後都下午5點幾了，當日自然唔會有行程啦，當一切安頓好及編排了往後三天行程後，便出去酒吧街行下搵飯食(真的是行下，很多地方，20分鐘腳程可到，Tuk Tuk錢都慳番)，之前睇過別人遊記，搵咗一間口碑唔錯既Khmer Kitchen Restaurant試吓當地柬埔寨既菜式，都幾好味架！

跟住走去附近既Old Market及Noon and Night Market行下，主要係格下價，睇下行情如何。之後便打道回府，幫襯番酒店的按摩(因為外面按摩好貴，起票8至20蚊一個鐘架)，呢處做全身都係4蚊一個鐘，超平，不過就係咁，我人生既第一次就俾.................間酒店竟然搵左個『男』既柬仔俾我，算，我唔想第一野就彈佢鐘，唯有合埋對眼，自我催眠，咁...........先可以勉強捱過，估唔到黎到呢處先俾個男人搞掂，慘！(但佢又真係按得唔錯，好細心，好溫柔！)

之後出去行下夜市，都幾多野買，價錢都可以咁啦！

其實呢處都算幾多野買，女仔黎到，可能會少少發狂都唔定呢﹖

成晚得個諗字，不如回房睇電視休息好過，因為明天便要開始行程，要影相嘛！